Samarqand shahrida oliy ta’lim sohasidagi muhim tarixiy voqealardan biri — “Markaziy Osiyo – Yevropa Ittifoqi universitetlari kongressi” bo‘lib o‘tmoqda. Mazkur nufuzli xalqaro anjumanda ISFT instituti delegatsiyasi ham faol ishtirok etmoqda.

Kongressda Markaziy Osiyo va Yevropa Ittifoqiga a’zo davlatlardan vazirlar, xalqaro tashkilotlar vakillari hamda 300 dan ortiq oliy ta’lim muassasalari rahbarlari jam bo‘ldi. Xususan, Yevropaning 45 ta yetakchi universiteti hamda mintaqamizning eng nufuzli oliygohlari vakillari o‘zaro tajriba almashmoqda.

Kongressning ochilish marosimida O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov, Yevropa Ittifoqining elchisi Toyvo Klaar hamda Polsha va Tojikiston ta’lim vazirlari so‘zga chiqib, ta’lim sohasidagi hamkorlikni strategik darajaga ko‘tarish bo‘yicha muhim tashabbuslarni ilgari surdilar.

Mazkur xalqaro platformada ISFT instituti nomidan Xalqaro hamkorlik bo‘limi boshlig‘i A. Alisherov ishtirok etmoqda.

Kongress doirasida ISFT delegatsiyasi quyidagi yo‘nalishlarda muzokaralar olib bormoqda:
— Polsha, Germaniya va boshqa Yevropa Ittifoqi davlatlari oliygohlari bilan akademik almashinuv dasturlarini kengaytirish;
— Talabalar uchun Yevropa standartlari asosida zamonaviy o‘quv metodikalarini joriy etish;
— Xalqaro ilmiy loyihalar va grantlarda ISFT professor-o‘qituvchilarining faol ishtirokini ta’minlash.

ISFT institutining bunday global miqyosdagi anjumanlarda ishtirok etishi uning xalqaro ta’lim makonidagi nufuzi tobora ortib borayotganidan dalolat beradi.

ISFT Instituti — dunyo bilan birga, kelajak sari!