Samarqand shahrida bo‘lib o‘tgan “Markaziy Osiyo – Yevropa Ittifoqi universitetlari kongressi” ISFT instituti uchun xalqaro hamkorlik yo‘nalishida muhim strategik yutuq bo‘ldi. Mazkur kongress doirasida institut Yevropaning nufuzli oliygohlaridan biri — Polshaning Katovitse iqtisodiyot universiteti bilan rasmiy hamkorlikni yo‘lga qo‘ydi.

Ikki tomonlama hamkorlik memorandumi (MoU) Polsha universiteti rektori, professor, doktor Celina Maria Olszak ishtirokida tantanali ravishda imzolandi. Muzokaralar davomida rektor Celina Maria Olszak hamda universitet vakili Dagmara Piskorz bilan ta’lim sifatini oshirish va xalqaro akademik integratsiyani chuqurlashtirish masalalari muhokama qilindi.

Hamkorlik doirasida quyidagi yo‘nalishlar belgilandi:

• Talabalar va professor-o‘qituvchilarning o‘zaro tajriba almashinuvi
• “1+1” va “3+1” formatidagi qo‘shma ta’lim dasturlari (Double Degree)
• Yevropa oliy ta’lim makoni (EHEA) standartlari asosida qo‘shma ilmiy-tadqiqot loyihalari

Mazkur hamkorlik ISFT institutining Yevropa Ittifoqi ta’lim ekotizimidagi o‘rnini mustahkamlab, talabalar uchun Polshada ta’lim olish va xalqaro darajadagi diplomlarga ega bo‘lish imkoniyatlarini kengaytiradi.